上世纪六十年代末七十年代初，上海曾经有过“堂吃西瓜”。堂吃西瓜，顾名思义，就是勒店堂里向吃个西瓜。现在个“吃瓜群众”可能会得觉着蛮奇怪个，为啥要到店堂里区吃西瓜？迭个里向有啥讲究伐？

　　我个朋友傅姐，对迭个记得邪气清爽。伊歇辰光，伊还是个中学生，对小姑娘来讲，有得堂吃西瓜个机会，当然是邪气兴奋个。傅姐搭仔自家屋里两个阿妹，从浦东傅家宅跑到崂山新村个搿爿堂吃西瓜商店，交了一角洋钿，三家头就坐勒店里向吃起来了，但是勿好带转去个。

　　到了九十年代末，上海行起了自助餐，有人寻开心讲，吃自助餐，要“扶牢仔墙壁进来，扶牢仔墙壁出去”，意思是，先拿自家饿昏脱，再拿自家吃得撑煞脱。迭个确实也是有种人吃自助餐个真实写照。

　　要搿能讲个闲话，上海其实老里八早就实行 “自助餐”了，不过，吃个物事是西瓜。西瓜切成一块一块，客人勿好只吃西瓜顶顶当中部分，拿边头部分侪厾脱个。有得营业员勒店堂间里勿停个巡回检查，及时制止浪费现象。傅姐伊拉三个小姑娘，一边吃一边嘻嘻哈哈，搭介许多人一道吃西瓜，伊拉觉着特别有意思。只看见有个人慢条斯理，文质彬彬，有个人吃相邪气难看，急吼吼个。三姐妹尽管呒没急吼吼个狼吞虎咽，但也是拿肚皮吃得滚圆再肯罢休。

　　堂吃西瓜个品种，是像大冬瓜一样大，瓜瓤个颜色是红彤彤个，甜度倒一般，产地据说是勒北方。因为西瓜忒大，里向个瓜子也是又黑又大个一粒粒。瓜子吃下来，必须吐勒店里提供个盘子里。其实，堂吃西瓜个奥妙，就是为了拿瓜子留下来，目的是回收瓜子。搿能，一来好晒干炒瓜子卖铜钿，二来么，明年仔要留种个呀。

　　当年，除脱堂吃西瓜，还有“刨皮西瓜”。我个老朋友道余兄今年86岁了，伊对出售刨皮西瓜个事体至今还记忆犹新。迭个跟堂吃西瓜是差勿多个辰光，当时道余兄勒杨浦区江浦路龙江路附近个六埭头卖刨皮西瓜。

　　伊歇辰光，每日天到下半日，店门口就有得男男头排起了老老长个队伍，侪是帮赤膊小鬼。营业员拿西瓜搬到店堂间，再一只只拣，生个瓜厾脱勿要，有几分熟个，摆勒旁边，过脱几日天瓜就自然熟了，好吃了。一只只分别拣好，营业员再拿西瓜汏一汏，切开来，瓜瓤挖出来摆到边浪个一只特大号镬子里，最后称分量卖。

　　沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

　　沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

　　本文为澎湃号作者或机构在澎湃新闻上传并发布，仅代表该作者或机构观点，不代表澎湃新闻的观点或立场，澎湃新闻仅提供信息发布平台。申请澎湃号请用电脑访问。